واتجمعت كل الخطايا
واتقابلت الشهوات
واتلخبط المقتول على القاتل
فسال الدم من قلب الحارات
..
واللى مات فى غزة مات
من زمان
مات وما بيشبعش موت
مات كتير
كل يوم نفس القتيل
...
صباح الدم يا غزة
صباح الغدر والخسة
صباح اطفال بتلعب موت
وناس ع الدم تتغذى
صباح الغز والمماليك
صباح البياعين والسوق
صباح فتحاوى حمساوى
صباح اسود بلون الليل
صباح مشبوه
وباسم الله هتندبحوا وبسم يهوه
عشان لازم يكون شرعى
لا يزعل مننا شيعى ولا سنى ولا حاخام
عشان لما يطيب اللحم ( ومش هيطيب )
لا حد يقول دا لحم حرام
ولا مؤمن يصيبه الشك
................
فداك كل الملوك والحكما والحكام
يا طفل اخضر ف ليل غزة بينزف خوف
فداك الكتبة والكذبة وامرا النفط
والشاعر ....
عديم الفايدة والحيلة
فداك قلبى اللى مات ساكت
فداك دمى اللى سال مرة ف ليل بغداد
ومرة من بيوت بيروت
ومرة من عروق غزة
..
ما فيش غيرك
خلاص احنا نخرنا السوس
صور وخلاص
يا دوبك ناس
نعيش ونحب ونخلف
بلا احساس
.......
امسح عينيك م الموت
نفض تراب السكوت
عنك وقوم تانى
العب ف حوش الدار
عسكر وحرامية
سجون وحرية
اوطان وشمس واغانى
..
اغسل عينيك بالريح
وامسحنا م الصورة
تنزاح يا ولدى العتامة
اول دروسك موت
اخر دروسهم قيامة
سمير مصباح
