صورتي
الاسكندرية, Egypt
اصعب المعارك................................. تلك التى تهزمك دون ان تدخلها................ محظوظ من استطاع ان يخوض كل معاركه الحتمية........ ...............................................وعموما ..............................................الضربات التى لاتقتلك.................. اشد قسوة .................... سمير مصباح

الاثنين، ٢ مارس ٢٠٠٩

مباشرة موت






واتجمعت كل الخطايا

واتقابلت الشهوات

واتلخبط المقتول على القاتل

فسال الدم من قلب الحارات

..

واللى مات فى غزة مات

من زمان

مات وما بيشبعش موت

مات كتير

كل يوم نفس القتيل

...

صباح الدم يا غزة

صباح الغدر والخسة

صباح اطفال بتلعب موت

وناس ع الدم تتغذى

صباح الغز والمماليك

صباح البياعين والسوق

صباح فتحاوى حمساوى

صباح اسود بلون الليل

صباح مشبوه

وباسم الله هتندبحوا وبسم يهوه

عشان لازم يكون شرعى

لا يزعل مننا شيعى ولا سنى ولا حاخام

عشان لما يطيب اللحم ( ومش هيطيب )

لا حد يقول دا لحم حرام

ولا مؤمن يصيبه الشك

................

فداك كل الملوك والحكما والحكام

يا طفل اخضر ف ليل غزة بينزف خوف

فداك الكتبة والكذبة وامرا النفط

والشاعر ....

عديم الفايدة والحيلة

فداك قلبى اللى مات ساكت

فداك دمى اللى سال مرة ف ليل بغداد

ومرة من بيوت بيروت

ومرة من عروق غزة

..

ما فيش غيرك

خلاص احنا نخرنا السوس

صور وخلاص

يا دوبك ناس

نعيش ونحب ونخلف

بلا احساس

.......

امسح عينيك م الموت

نفض تراب السكوت

عنك وقوم تانى

العب ف حوش الدار

عسكر وحرامية

سجون وحرية

اوطان وشمس واغانى

..

اغسل عينيك بالريح

وامسحنا م الصورة

تنزاح يا ولدى العتامة

اول دروسك موت

اخر دروسهم قيامة




سمير مصباح


هناك ١٤ تعليقًا:

ســـــــهــــــــــر يقول...

امسح عينيك م الموت

نفض تراب السكوت

عنك وقوم تانى

العب ف حوش الدار

عسكر وحرامية

سجون وحرية

اوطان وشمس واغانى

______________________

يا صاحبى ..
دا الدرس
و اللى بلا قلب ..
انعدم فيه الحس
و اللى على قلبه غشاوه
الكلمه ليه ما تمس
و اللى بلا قوه ..
يفيده ايه الدرس


بنعيش بلا معنى
و الموت اكيد معنى
محتاج قلوب بيه تحس

**************************

سيبك م الارتجاله العبيطه دى

انا جايه اعبر عن فرحتى بعودتك استاذى
بجد الايام اللى فاتت كنت باجى كتير اقرا ف القديم و مستنيه طله جديده

كان قلبى ف عرض حتة شعر تجيبه الارض
ابداعا .... و جت حتة الشعر و جابته الارض ابداعا و احساسا و فتحت بوابات جرح

حسن ارابيسك يقول...

امير المدونات
سمير مصباح
اذيك ياأبو سمره أيوه كده نورت المدونة تاني برجوعك ونروت مدوناتنا بتوقيعك الجميل

فكرتني واللهي بشعراء مصر العتاولة في كلامهم الي كان بيدبح لما الواحد منهم ينتفض قلبه جواه ويتحول لسانه لكرباج يلسوع في أمتنا النايمة نوم أهل الكهف واستحلت النوم
الكلام الحلو ده عاوز يتبروز في ديوان جميل عليه توقيع سمير مصباح
تحياتي
حسن أرابيسك

الازهرى يقول...

وباسم الله هتندبحوا وبسم يهوه

هتندبحوا ومهما يكون
دا حكم قديم
ويوم ما تنادوا يا اخوانا
تلاقوا الخونة بالسكين بيلبوا
ودم كتير بيملى الارض والاشجار

مفيش غير السلاح بيعين وقلب حديد
وطفل بيكبر عارف قضيته وعدوه
وعالم مين صديقه ومين يتمنى له الموت

تحياتى للقلمك الجميل واحساسك الاكثر من رائع
يعم الله كم افتقدتك طوال الايام الماضية
عودا حميدا استاذنا الجميل

eshrakatt يقول...

ما فيش غيرك

خلاص احنا نخرنا السوس

صور وخلاص

يا دوبك ناس

نعيش ونحب ونخلف

بلا احساس


.......



امسح عينيك م الموت

نفض تراب السكوت

عنك وقوم تانى

العب ف حوش الدار

عسكر وحرامية

سجون وحرية

اوطان وشمس واغانى


_______
ممكن الى دخل الطحونه يخرج منها تانى؟

اعتقد ممكن ياشاعر
حمدالله على السلامه

وحشتنا

ســمـــر احمد يقول...

و بنكتب الكلام .. ملام لينا ..
و و الدمع نازف طوفان
و احنا ولا بكينا ..
مهو اصل الخاين احنا
و اللى اتخان ..
فينا ..

استاذى العزيز ..
تحية ود و تقدير و زيارة اولى لمدونتك الرائعة

Unknown يقول...

مش معقول
بجد
بجد
مفيش تعليق عندى ينفع
الله ينور

محمود محمد حسن يقول...

ايه ده ؟؟ !!

ده شعر بجد وحق وحقيقي ؟!!

من زمان الواحد ما قراش كلام جامد بالطريقة دي،

ابهرتني

سمير مصباح يقول...

الجميلة ســـــــهــــــــــر

المفرح حقا هو وجودك وكلماتك الرقيقة
التى اتمنى ان استحقها فعلا

دمتى شاعرة جميلة ومبدعة

سمير مصباح يقول...

الشاطر حسن ارابيسك

الله يسلمك يا ابو على
وارجو ان تتحملونى هذه الايام
احاول اعادة ترتيب وقتى وحياتى

شكرا يا ابو على لتعليقك الجميل

اما عن موضوع الديوان فهذه قصة يطول شرحها

اشكرك على شعورك الجميل يا صديقى

سمير مصباح يقول...

الازهرى العزيز

اعلم يا صديقى اننى مقصر معك ومع الاصدقاء جميعا غير اننى اثق فى تسامحكم معى
ويعلم الله كم اسعدتنى كلماتك

ذلك الشعور بان هناك من ينتظرك يدعمك كثيرا فى الحياه
اشكرك يا صديقى
ودمت جميلا

سمير مصباح يقول...

eshrakatt فى ليالى العتمة

ايوة ممكن اللى دخل الطاحونة يخرج تانى


بس ممكن يخرج (فتافيت)

سمير مصباح يقول...

ســمـــر احمد

يااااااه

اول زيارة واتأخر عليكى كدة فى الرد ؟


اسف بجد

اسمك نور صفحات مدونتى المتواضعة

دام وجودك

سمير مصباح يقول...

enjy

الله نورلى فعلا حياتى باصدقاء مثلك

ونورتى مدونتى بوجودك

كل الشكر لكى

سمير مصباح يقول...

محمود محمد حسن صاحب الشخابيط الممتعة


اولا اسف على التأخير

ثانيا اشكرك على كلامك الجميل

دام تواصلك