هلاويس

وخدت بعضى ... وسبت بعضى ،و مشيت
البحر.. ما كانش صاحبى ، والقمر ..
ما حبش الحواديت
ــ انا بحتلك بالحب ولا نسيت ؟ ــ


قلبى بينزف دهشه ع الاسفلت
عينيكى احلى لما تبتسمى؟
ولا اما تنوى البكا ؟
كل السكك متشبكة ومربكة
- انا كنت رايح فين ؟ -

لسه العساكر ع السهر ناويين
و انا كنت هعمل حاجة ممنوعه
- انا كنت هعمل ايه ؟ -

الترميات اتشعبطت فيّا
واتكعبل الاسفلت فى جزمتى
وعيونى وقعت منى ما لقيتهاش
والذكريات .. بتجرى منكوشه
- مين اللى غز فقلبى غصن زتون
وعشّى بيه الجيوش ؟-

قلبى بيكتب حاجه ع العواميد
- قلبى بيكتب ايه ؟-
كل السكك بتودى ليه لبعيد؟
وانا كنت شايل دمى للعوزه
وعزته مالقتهوش


العتمه بير وحشه بينضح خوف
وانا كنت فاكر قلبى ما بيخافش
خايف اقوللك بخاف لتخافى على حلمك
ــ شهقت عنيكى ولا قلبى شهق ؟
لما ايدينا اتسرسبت من بعضها ؟ ــ



برفع عينيا لفوق.. قالتلى نجمه وحشتنى ، فاكتشفت ..
انى بقالى زمان .. ماشى وانا مطاطى

- هو انتى لسه انتى ؟
ولا انتى اللى ف نشرة الاخبار ؟ -


قمر قديم قاللى بحب الشتا
وبونس المساجين
وبخاف من العمارات
وبصاحب العشاق
وريته صورتك .... باس ايديا ومات


مشتاق للمسة ايديكى .. جلد الشوارع خشن
وعنيكى ما بتشبهش لعيون العساكر
وانا لسه مش فاكر
انا كنت رايح لجل اجيبلك ايه ؟


سمير مصباح